ليش لوحدك من غير جناز ------- ياهو الغسلك ويغمض العيون
غريب بنص محطة وراغب اجانب ------ واهلك عنك بعيد شلون يدرون
اليموت بنص اهلة تدهدل اهدال ------- عليه امة وخواتة ايطيحن امتون
اشوفك وحدك وانت القبل جان -------- الجبل والساتر ابسدك يلوذون
ملك موتك استعجل لو توانيت -------- ترد لارض الوطن جا هسة مدفون
دليني بجوازك خاطر اقراه ----------- واشوف اشكد صارلك بالغربة مسجون
من وحشة الغربة لوحشة الموت ------ وشربت الوحشتين ابفرد ماعون
عليك اتعاين امك هلبت اتعود ------ وضعنك ما رجع من بين الا ضعون
عدمن ودعتها وجيت ليجاي ------- وعليك اتناشد اليرحون واليجون
حكها شتدري عنك وانت معذور ----- صرت خشبة اعلى خشبة هنانة مرهون
تريدك عون يمها بتوالي الليل ------ وهسة انت ضعت وتريدلك عون
وحدك تنخة روحك جنك اتكول ------ هلي يا من ضيعوني شلون ينسون
الي مثلك ما يموت واهلة تنساه ----- العراقي انت الاصيل وتنسي اشلون
جنت بيرغ عالهامات مرفوع ------ وجبينك منحنة وغيرك يدنكون
الي مثلك ما يظل من غير جناز ------ النخل يمشي وياك وية اليشيعون
الي ينظرولك خطية ومتت مسكين ----- الف فدوة لشواربك كون يرحون
المن جابتك للغربة رجليك ------ ومتت لا ناعية ولا ناس يبجون
اتكولي العوز اكلك انت غلطان ----- العراق بخير بعدة ولسة مامون
صحيح الجوع كافر لليمر بيه ------ وانة مجربة واعرفة شلون ملعون
حافي وساوموني وكلت ما ابيع ------ وشلت غيرة هلي العشرين مليون
اثبت لا تهزك رعشة العوز ------- الشدايد صم صبر وتعدي وتهون
العراقي شما تمر بيه الملمات ------ جلد عالنايبة وبالصبر مدهون
انة يا صاحبي راجع للعراق ----- واسولف قصتك للي يسافرون
واكللهم نهر ذلة ورة الحدود ----- وانة خايفك عليكم لا تغركون
موضوع: عراقي وافته المنيه في الغربه 
الإثنين مايو 04, 2009 11:59 am
